يعنى أيه بحبك ؟

بحبك يعنى مش مهم انى تعبانه معاك ده احسن مية مرة من أنى ابقى مرتاحه مع غيرك

بحبك يعنى فنص محنا بنتخانق أحس أنى عايزة أققوم أحضنك و أعيط

بحبك يعنى بغير عليك لو حلمت بواحدة غيرى أما لو بصيتلها بقى فده موضوع تانى  !

 

بحبك يعنى الهديه اللىّ تجيلى منك حتى لو محبتهاش و حتى لو مكنتش هجبها لو شفتها من لحظه مبتجبها بيبقى لا يمكن الاستغناء عنها 

بحبك يعنى لو اقدر أغير فيك حاجه هتبقى أنى أخليك تحبنى أكتر لكن مش هغير فيك أى حاجه تانيه أنت زى ما أنت كده بعبلك :)

بحبك يعنى لما أقولك أبعد عنى بيبقى قصدى خدنى فحضنك 

بحبك يعنى بتجنن عليك بس لما تزعق فيا بقبقى زى العيال الصغيرين خايفه و عايزة أعيط 

بحبك يعنى لو لابسه أحلى فستان فى الدنيا و كل الناس مبهورة بجمالى بس أنت مقلتليش أنى شكلى حلو أحس أنى لبسه شوال بطاطا مقطع ووشى ولا بليه الميكانيكى و هو طالع من تحت العربيه 

بحبك يعنى المأذون ده مظنش كان ممكن أفكر أروحله ألا لم أنت بقيت الحد اللى هيقعد قصادى و هو بيننا بيسألنى موافقه عليك ولا لأ

بحبك يعنى أخاف لما أصلى متصليش أنت كمان و أروح أنا الجنه و أنت مش معايا 

بحبك يعنى لو ماشيه جمبك و أحنا متخانقين و مش طيقاك و قابلنا واحده عينها عليك هنسى الخناقه و أتشعبط فى دراعك و لو عرفت أخبيك منها هخبيك 

بحبك يعنى حتى و انا بكرهك و على اخرى منك بحبك 

بحبك يعنى بيبقى نفسى احضنك و امسك ايدك بس خوفى انى ربنا يعاقبنى بأنى أخسرك بيخلينى أتقلى الله فيك و أستنى و أصبر لحد متبقى جوزى و بعدها أيدك دى هلزقها فأيدى بغرا ! 

 

أفكار مبعثره 2

حبى لك خارج عن نطاق العقل , فبالعقل انا اليمين و انت الشمال و لكن بالحب يمكن لهما ان يلتقيا اذا لم يستمرا فى خط مستقيم


و احب القراءه و أعلم أنك لا تهواها و لا اريدك ان تهواها و لكن كم أحب أن أجلس أنا أقرأ بينما تشاهد انت المباراه ثم انظر اليك من وراء الصفحات و ابتسم بينما تصرخ لتشجيع فريقك . كم أنت جميل و انت غاضب ! . و بينما أسرح مرة أخرى بين السطور ترتكز عيناك على و جهى السارح و أناملى تداعب شعرى , انا أتخيلك بطل القصه المجنون فى الحب الشجاع فى الحرب و أنت تتساءل أن كانت هناك اى أمرأه على وجه الارض أجمل منى . لا يهمنى أن تشاهد غير ما اشاهد و لكن يهمنى ان لا ترى عيناك سواى

أفكار مبعثره

جوايا كلام كتير قوى مش عارفه يطلع أزاى بس حاسه أنه لازم يطلع . عايزة أعمل ميت مليون حاجة فى نفس الوقت و أشتغل ميت حاجة مع انى شغلانه واحدة مش نافعه فيها !
و عايزة أستغل كل لحظة فحياتى لان فعلا بحب الحياه أو يمكن بخاف قوى من الموت . عمرى مفهمت ليه الناس عايزة تموت مستعدين قوى يعنى تقابلو ربنا ؟ عارفين هتقولوله ايه ؟ ولا يمكن أنا بس اللىّ عامله بلاوى و بقيت الناس واثقه قوى من أعمالها ؟ مظنش !
أزاى اققف اتحاسب عن كل كلمه و كل حركه عملتها ! الفكرة نفسها مرعبه مبيهونهاش عليا الا أنه رحيم و رحمته و سعت السماوات و الارض .