ام الدنيا

يعنى اية مصر ؟يعنى الصبح دينية مستهبلة و بليل مدنية مستعبطة
يعنى لازم المسلم يربى دقنه و المسلمة تلبس حجاب و المسيحى و المسيحية يلبسو صليب لحسن حد يتوه و لا حاجة!
يعنى بلد ليها 85 مليون رئيس و خد بالك مشاء الله كلهم صح و كلمهم لازم يتسمع
يعنى الاب و الام ميعلموش ولادهم أى حاجة و يخنقوهم و يفتكرو أنهم عارفين عنهم كل حاجة مع العلم انهم الحمد لله انهم عارفين العيال اساميهم اية و خد بالك العيال يفضلو فى بيت أبوهم لحد ميتجوزو أمال هنعمل زىّ الامريكان و لا أية ؟! لا العيال يفضلو مع أهلهم على أعتبار أن دة بيحميهم و بيخليهم يعيشو فى جو اسرى دافى
و من جهة الدفا الصراحة هو بيبقى دفا قوى قوى و لدرجة امه بيبقى حر و جهنم بس العيال لازم تستحمل عادى عشان يعرفو ان الجواز مسؤلية و ان كله خناق و نكد و ميسدقوش عبد الحليم ولا تامر لو قالو غير كدة
اة بمناسبت تامر أى حد بيسمع تامر هنتريق علية مش مهم الاغنية حلوة ولا لأ مش مهم أى حاجة
مصر هىّ الحضارة و التريخ اللىّ بنحفظة و نحطة فى الأمتحان
مصر يعنى فى ناس عايزة حكم اسلامى و ناس بتقول عليه اة عشان خيفين يتقال عليهم كفرة و دة معناة أنك مش لاقى تاكل بس يتطبق عليك حد السرقة و مش عارف تتجوز بس يتطبق عليك حد الزنا أنت فاكرها سايبة ولا أية ؟ لازم تصلى و تصوم و تحجب البنات و تربى دقن الولاد مش مهم يقتنعو لا لأ اقتناع اية و قلت ادب أية أنسى الكلام بتاع ربنا اللىّ بيحاسب و أفتكر أن دى الحرية أوعى تكون فاكر أن دة ضد حريتك لأ أبدا بيتهيألك
نسيت اققلك لو أنت مسيحى لزما و لابد تقول لأ للمادة التانية مش مهم تقتنع اسمع بس الكلام المادة التانية مضرة جدا للصحة و لو قلت نعم فى الستفتاء توب بقى
مصر يعنى أحنا مش زى الأجانب نحب و نصاحب الصحوبية حرام بس أنت لو سمتها أرتباط يبقى عداك العيب و بعدين برا بقى عندهم بوس و مسخرة هنا لأ هنا ممكن تتفرج على فيلم من اياهم على الكمبيوتر و ممكن انت و حبيبتاك تبوسو بعض و ممكن اكتر الله مش نيتك خير ؟ و محدش شافك ؟ و بتقول لصحابك أنت عمرك ملمستها ؟ يبقى أنت مية فل
خد بالك لو اى حاجة فى القداس او درس الدين لقيت فيها حاجة كدة و لا كدة أوعى تسأل أوعى تقول حد يقنعنى و أوعى تعارض تدخل النار و أوعى متروحش الكنسية و لا الجامع تانى تروح النار و أوعى تكون مش بتحب الحوينى و محمد حساّن حرام عليك تروح النار بص من الاخر مهما كان دينتك نت رايح النار بس أوعى تعمل ذنوب لتروح النار بردو
خدبالك كانا عايزين نحرر فلسطين و كلنا مستعدين نموت عشانها حتى لو كانت علاقتك بالقضيق الفلسطنية لا تتعدى أغنية فيروز
قبل منسى علاء الاسوانى وحش اصل روياته سافلة قوى كل الشيوخ و الاخوان بيقولو كدة متحولش تعرف عرفو منين و لا تسئل طب لما لقو أول رواية مش عجباهم قرو التانية لية كل دة مش مهم المهم متجبش روياتة و لو عايز تعرف قال اية فى القصة أسأل اى حد الشعب كلة عارف !!
لازم تقول بكرة مبارك و لو بتحبه قلها بصوت واطى و لو عايزتنضم لأنا أسف يا ريسّ أعمل اكونت من غير أسم لحس تلاقى صحابك بعدو عنك أكنك جربان

خد بالك لازم تتجوز مش مهم عايز ولا لأ و مش مهم مستعد ولا لأ لازم تتجوز و خلاص لحن تنحرف و البنات تعنسّ و أوعى تتجوز واحدة مشيت معاها و لا عرفتها من على النت بس ممكن تكدب و تقول للحاجة انك شفتها فى الشارع و بقالك 20 سنه بتمشى وراها و تعاكسها لحد متأكدت من أخلاقها
أعذرونى لو كلامى مش عجبكو أو العربى بتاعى ركيك و مكسر أصلى لازم أكتب عربى مهو الفرانكو بقى ضد الهوية اللغوية (أوعى حد يسئل يعنى أيه هوية لغوية أحسن ياخد دش ساقع قوى عن الشباب الضايع اللى مش عارف عربى )